Begge Peder - Mei Leebe
Es war nitt ze vermeide das isch desss Lischt von deere Welt erblickt hunn. Als Bub von zwaa Eldern hunn se misch eines Daachs im Besucherritz im Bett gefunne. Saat mei Mudder: „Ei, wenn er jetz halt emo do iss, dann ziehe mern aach gross!“
Aufgezooche mit Muttermilch und Brei binn isch zimmlisch schnell gewachse. Domols saat mei Mudder schon: „Der wächst nitt nur wie ferriggt, der wird aach als dicker unn fauler !“ Als isch mit meim erste Milschzah meiner Mudder beim Stille in die Brust gebisse hatt, habbesse misch uff fest Nahrung umgestellt. Frikadelle, Klööß, Kardoffelbrei, Wersching ….also alles was gut ze kaue war. Domols schon stellte sisch die „erste Laune der Natur“ ein.
Der obbere Milschzah in de erst Reih wollt nitt wachse. Gut, der hett jo aach so un so nitt vill ze schaffe gehabbt. Mei Kinnerzimmer mussd isch mer mimm Schäferhund von meim Vadder deile.
Mei Eldern habbe domols schon mit mir nitt vill geschwetzt. Abber, es hott mer nix geschaat Mit meine kurze knappe Sätz mach isch nitt lang dorum, weil jeder waas gleisch gannz genau was isch will. Oder anners ausgedrückt: Isch beschränge misch mit meim Wortschatz uff´s Wesentlische.
Bitte unterstützen Sie gemeinsam mit mir:
Wer suchet, der findet..
Die Schulzeit war genauso korz und knapp wie mein Wortschatz. Blockflödeunnerrischt hatt isch, wie isch aach in meim Programm „Uffbasse“ erzähle, beinahe. Ohne Hauptschulabschluss un mit weenisch Lust uff´s Schaffe geh, binn isch bereits mit vierzehn Jahren, dursch die Beziehunge vomm Vadder, bei der Stadtverwaltung eigestellt worn.
Doode nooch habbesse meim Vadder sei „Beziehung“ fristlos noch 25 Dienstjahrn unehrenhaft entlasse. Isch binn jo seit meiner Eistellung unkündbar, weil isch zuvill über die Vergangenheit vonn meim unmittelbare Vorgesetze, dem Bürgermeister, weiß.
Von meim erste Geld musst isch mei Eldern für die noch deren Meinung erfolgreische Erziehung ausbezahle. De Rest vomm Geld habb isch mitt meine Kumbells versoffe..
Wie isch grad sibbzeh geworn war hunn isch an de Fassenacht, beim Lumbeball, in de Sektbar vom Fussballverein „mei Fraa“ kenne gelernt. Die war grad fuffzeh geworn und debei, in ihrer Tätischkeit als Kellnerin, den mit Sekt verklebde Boddem uff zewische ….
Im Juli habbe mer dann geheiraat und Aafang November kam dann „de Bub“ als Wunschkind uff die Welt. Unsern Rudi iss in de Schul aach grad nitt die Kanon, abber
dorsch mei Beziehunge bei de Stadt, werd der schon enn Abbeitsplatz krieje. ……
Isch un mei Fraa hadde vor Korzemm silbern Hochzeit. Isch hatt an deem Daach kaa Zeit mit meiner Fraa un de Verwandtschaft ze feiern, weil mein Kumbel ausem Schrebergadde hatt an deem Daach Geburtsdaach unn der hatt misch schon vill länger eigelaade als mei Fraa.
Seit deem mir verheirat sinn wohn isch un mei Fraa in fünfte Stock innere zwaa Zimmer, Küsche, Bad Wohnung für 370 Euro kalt. Jetz sinn mer endlisch umgezooche in unser Haus ins Kängeroo-Färdell (Kängeroo-Viertel), also ins Neubaugebiet, do wo die Neureische wohne,deene ich mei Äcker verkaaft hab´. Scheidung kemmt für misch nischt in Fraache, …………..weil, .. wer soll dann für misch koche, die Wäsch wesche unn so.
Mei Hobby´s sinn:
Mein Schrebergadde, dess „Sportlerheim“, mei Skatkumpels, Spass ann de Schadefreud un …………. de Schäferhund, ………………… un weider nix !!